Sunday, December 2, 2012

ගසක් අඬනවා දැක තිබේ ද ...?



 
මේක අපි ඉපදෙන්නත් ඉස්සර 1959 දි විතර ප්‍රකාශයට පත් වූ පරිවර්තනයක්.

මුල් කෘතිය ලියල තියෙන්නෙ විකී බෝම් මැතිණිය විසින්. [ සත්‍ය සිදුවීම් මත පදනම් ව ]

සිංහල භාෂාවට හැරවිල තියෙන්නෙ .. පූජ්‍ය ඌරාපොල හේමාලෝක ස්වාමීන් වහන්සේ සහ හේමපාල විජේවර්ධන මහතා අතිනුයි.
 
 

මම මේක ඉස්සෙල්ලම කියෙව්වෙ පාසැල් යන කාලෙ. හුඟක් විචාරකයො කියල තිබුණ දෙයක් තමයි මේ පොත වාර්තාමය ස්වරූපයකින් ලියවිලා තියෙනව ය කියන එක.

නමුත් මම නම් ඒකට එකඟ වෙන්නෙ නෑ .. මේක සාමාන්‍ය නවකතාවක් වගේ කියවගෙන යන්න පුලුවන්.

[කියවල ඉවරවෙනකම් ම බිමින් තියන්න හිතෙන්නෙ නැති ජාතියෙ පොතක්]

මුල් කෘතියෙහි රසය ඒ විදිහටම අපට ලැබෙන ආකාරයෙන් පරිවර්තනය කර තිබීමත් මීට එක හේතුවක් වෙන්න පුලුවනි.

ඒ වගෙම මේ කතාව හරිම සංවේදියි. .. හද සසළ කරවන සුළුයි.

මෙහි අන්තර්ගත වෙන්නෙ රබර් ගසේ කතන්දරය. රබර් කිව්වම දැන් අපට බොහොම සුලු දෙයක් නොවේද ..?  අලුත උපන් ළදරුවාගෙ සූප්පුවේ සිට වැඩිහිටියන් ට ඇවැසි වෙන කොණ්ඩමය දක්වා .. රබර් භාණ්ඩ ඕනෑ තරම්.

නමුත් ඒ කාලෙ එහෙම නෙවෙයි ... මේ රබර් නිසා බොහෝ මිනිස්සු දුක් වින්දා. හාවි පයර්ස්ටෝන් .. එතකොට චාල්ස් ගුඩ් ඉයර් වගෙ මිනිස්සු මානසිකව බොහෝ දුක් විඳපු අය.   [ දැන් නම් ගුඩ් ඉයර්ලගෙ ටයර් ලෝකෙ පුරාම ප්‍රසිද්ධයි ]

නමුත් ඔවුන් ඒ ව්‍යාපාර පටන්ගෙන ඉදිරියට ආවෙ බොහෝ අවහිරතා මැද්දෙ. අන්තිමේ ගුඩ් ඉයර් මියගියෙ බංකොළොත් වෙලා හිඟන්නෙක් විදිහට.

ඒ වගෙ අය මානසිකව විඳවනකොට .. තව කට්ටියක් හිටියා ශාරීරිකව වද විඳපු. ඒ අය තමයි රබර් ගස වැවුනු.... දකුණු ඇමරිකාවෙ කැලෑවල වාසය කරපු... සමහර මිනිස්සු. එයාලට බල කරනු ලැබුවා .. මේ අඬන ගසේ කඳුලු එකතු කිරීමට. එසේ නොකරන අයට තද දඬුවම් ලැබුනා .. නැතහොත් මරණය හිමි වුනා. බ්‍රසීලයේ කැලෑවල වාසය කරපු සමහර ගෝත්‍ර සමූලඝාතනය කෙරුනා .. මේ රබර් නිසා.

මෙහි එක් ගෝත්‍රිකයෙක් වද දෙනු ලැබ මරණාසන්න ව සිටියි. [ ඊට හේතුව .. ඔහු එදිනට නියමිත රබර් ප්‍රමාණය එකතු කර නොදීම ] මිය යමින් සිටිය දී ඔහුට පහළවන සිතුවිලි මෙබඳුයි. '' මම මේ වනයේ සාමයෙන් ජීවත් වුනෙමි. නිදහසේ සතුටින් සිටියෙමි .. මේ කඳුලු ගස් මෙහි පැළවුනේ මක් නිසා ද...?  මා මියගිය පසු මේ අඬන ගස් නැති රටක ඉපදේවා යි පතමි ''

මේ පොත කියවා හමාර කළ පසු ... බොහෝ මිනිසුන් ගේ ලේ සහ කඳුලු මැදින් ඉදිරියට ආ රබර්වලින් සෑදූ සෙරෙප්පු දෙකක් කිසිම ගානක් නොමැති වපය ලා ගෙන සිටීම පිළිබඳව මම ලැජ්ජාවට පත් වුනා.

ඔයගොල්ලොත් හොයාගෙන කියවලා බලන්න. මෙතෙක් කල් කිසිදු තැකීමක් නොමැතිව රබර් භාණ්ඩ පරිහරණය කිරීම ගැන ඔබත් මා වාගේම ලැජ්ජාවට  පත් වෙනවා ට සැකයක් නෑ.

 

ගොඩගේ පොතක් ..

ප්‍රකාශිත වර්ෂය  1959

පිටු  784

 ISBN  10  9552012821

මිළ  රුපියල්   500/-

12 comments:

  1. බොහොම හොඳ විස්තරයක් මිත්‍රයා. මේක ගැන කියද්දි මතක් වුනේ “වහල් යුගය“ ගැන ලියවුණු “ටොම් මාමාගේ ලෝකය“ කෘතිය. දෙකේම සමාන ලක්ෂණ තියනවා. ඒ වගේම තවත් දුර්ලභ පොත් ගැන ලියන්න. ඒක බොහෝ දෙනෙක්ට වැදගත් වෙයි. විශේෂයෙන්ම කවරය බලලා පොත නොබලා පැත්තකින් තියන ඇත්තන්ට

    ReplyDelete
    Replies
    1. ටොම් මාමගේ කුටිය කියන පොතමද ජනරංග ..

      Delete
    2. ඇත්තටම හුඟක් හොඳ පොත් තියෙනවා ... වැඩිය ප්‍රසිද්ධ නැති. ඒ හින්දම ඒව පාඨකයො අතරට වැඩිය යන්නෙ නෑ.
      පොතක් ගැනීමේ දි .. පිට කවරෙ ම බලන්නෙ නැතුව .. පොඩ්ඩක් එහෙන් මෙහෙන් කියවල බලනවනම් තමයි හොඳ.
      ''ටොම් මාමගෙ කුටිය'' නම් මට කියවන්න හම්බවෙල නෑ තාම. හොයල බලන්න ඕන. ස්තූතියි ඒ ගැන දැනුම් දුන්නා ට.

      Delete
  2. කියවලා නම් නෑ..මමත් පොත් වලට හරිම කැමති කෙනෙක්නෙ... ඒ උනාට දැන් පොත් වල ගාන හරිම සැරයි අප්පා...

    ReplyDelete
    Replies
    1. ඇත්ත තමයි ලිහිණි ...
      සමහර පොත් ටිකක් විතර ගණන්. හැම පොතක් ම අපිට සල්ලි දීල ගන්න බෑ.
      ඒ හින්ද අපි කරන්න ඕන තමන් ඉන්න ප්‍රදේශයෙ තියෙන පුස්තකාල කීපයක් ආශ්‍රය කරන එක. [ මමත් එහෙම කරනවා ]

      Delete
  3. මට ඉස්සර කියවූවා වගේ මතකයක් තියෙනවා ,.නමුත් ස්තුතියි ..ආයේ කියවන්න ආසා හිතුනා .. ඇත්තටම අද අපි සැහැල්ලුවෙන් බලන තේ , රබර් , කෝපි වගේ ගස් වල අතීත කතන්දර හරිම දුක්බරයි .

    හේමාලෝක හිමි නේද සාරභූමි පරිවර්තනය කලේ . මට ඒ පොතත් ආයේ සොයා ගන්න උවමනාව තියෙනවා . අය්යෝ කොච්චර පොත් ගොඩක් මට ගන්න තියෙනවද .

    ReplyDelete
    Replies
    1. ඔබට තේ සහ කෝපි වගාවෙ දුක්බර පැත්ත දැනගන්න ඕන නම් .. ''තිත්ත කෝපි'' සහ ''අලි පාර'' කියන පොත් දෙක කියවල බලන්න.
      ඇත්තෙන් ම ''සාරභූමි'' පරිවර්තනය කළෙත් .. මේ The weeping wood පොත පරිවර්තනය කරපු දෙපොල ම තමයි.

      Delete
  4. නැද්ද ඩවුන්ලෝඩ් කරන්න ලින්ක් එකක්වත්?

    ReplyDelete
    Replies
    1. හොයල බලන්න ඕන සෑමෝ ... සමහරවිට අපේ ''මරණෙ '' දන්නව ඇති ඔය ගැන. මම අහල බලන්නම්.

      Delete
  5. මමත් කියවන්න බලාපොරොත්තුවෙන් ඉන්නේ..ලයිබ්‍රියෙ පිහිට තමයි

    නිරෝගී වේවා෴දීර්ඝායු වේවා෴ සැප වේවා෴චිරං ජයතු!!!

    ReplyDelete
    Replies
    1. අනිවාර්යයෙන් ම කොළඹ මහජන පුස්තකාලයේ නම් මේක ඇති.

      Delete
    2. ඔබටත් .. දීර්ඝායු වේවා.. සහ නිරෝගී වේවා.. කියා පතමි.

      Delete